之前同大家介紹過 iPhone 上，可以一次過搜索手機中重複相片的程式，用過之後，覺得可能受到機能所限，有幾個弱點，除了會搜索到一些並不相同的相片，又或者未有詳細的資訊（檔案體積、日期參考）等等，令到刪除時有點不順利，後來於 OS X 上再搵搵原來有幾款類似的軟件，裝上之後就可以將問題解決晒。
在 OS X 上，我搵到比較多可以做到搜出重複相片的軟件，其中亦試過幾款，當中包括有最先安裝的 Photo Duplicate Cleaner、Photo Cleaner（不值一提）、Photo Sweeper Lite 及 Duplicate Photo Finder；最初安裝的是 Photo Duplicate Cleaner，以免費軟件來說，搜索出來的相片其實算是準確，同時亦具備 Auto Mark 功能，可以根據用戶的先決條件進行揀選相片，方便用戶一次過刪除，不過最大的問題是未能支援外置硬碟或網路硬碟（小弟將相片放於外置儲存或 NAS），所以到最後要另尋軟件協助。
之後搵來搵去，搵到 Photo Sweeper Lite（有 Pro 版，HKD$78，呢個都要 HKD$23），因為有試用所以裝上，之後發現可以一次過搜索到外置硬碟及 NAS 中的相片，一次過解決問題，就唯有乖乖付款。
軟件用法其實都好簡單，只要將相片於介面中加入 Folder 的方式即可。
加入相片之後會變成一個相片庫，使用者可以同時加入多個 Folder 進行對比，選定之後按 Compare。
之後畫面就會搜出所有相當相片，當中用戶可以自行選擇，或者利用 Auto Mark 方式選擇一次過刪除。
不過購入軟件之後，發現原來同廠有推出一個名為 Duplicate Photo Finder 的軟件，可以做到相類似功能，估計背後的開發引擎相同，所以搜索介面及準確度相似…不過筆者由於已經買了之前的 Sweeper ，所以未有進一步測試其在 NAS 上的搜索能力，有興趣的話可以先試試這個，適合的話咪當支持一下開發者囉～都係 $23 HKD…
