相信好多朋友都試過好鍾意某套電影，但電影公司並沒有推出最新格式的版本，例如家陣大家都鍾意睇 4K 版本電影，偏偏好多電影出咗 Blu-ray 之後就無再推出更高畫質嘅版本，就好似彭浩翔的第一部長篇電影作品《買兇拍人》，就係巴頓其中一套十分喜歡的本地作品，套戲今年仲係 20 周年紀念。
可惜幾年前出咗 Blu-ray 之後就無再出 4K 版本，好在近排巴頓喺 Apple TV 搵到呢套戲嘅 4K 版本，仲要 Dolby Vision 加持，於是二話不說即刻入嚟睇，發覺畫質又再比幾年前的 Blu-ray 版本提升，雖然電影好多場景都係室內，但不論係清晰度及顏色表現都有所改善，大家可留意兩位男主角的家中佈置在光暗及立體感表現上都十分討好，葛民輝家中以白色及光鮮為主調，而張達明的家中則以昏暗雜亂形成對比。最後一幕在龍華酒店的大龍鳳，大小混混的服飾色澤豐富，都凸顯出 4K 版本的好處，巴頓執筆時呢套片 iTunes 仲係賣緊 $48 ，即科水啦！
