由 N64 年代已經有嘅《 Mario Party 》一直都好受大家歡迎，亦都係現今最長壽嘅小遊戲系列。小編最鍾意就係佢將大富翁元素融合小遊戲，但亦都因為咁樣有人會覺得佢悶，咁究竟係咪真係咁悶呢，就等小編試下啦！
[ot-video]
無得 handheld ，都係插返個大 mon 啦！
講 gameplay 前，講下大家最關心嘅有冇得拎出街玩先！又唔可以話佢冇，但實際上大家又真係唔可以用 handheld mode 玩，即使插大 mon 都唔可以用 Pro 掣或者將 Joy-Con 插落 grip 度玩。所以如果喺屋企玩嘅都係插返個 mon 啦，如果係攞出街同人連機就記得搵個可以坐定定嘅位先玩！
Mario Party 模式好無聊？
Mario Party 模式即係最傳統嗰隻玩法，不斷儲 coins ，經過星星就可以俾錢買。每回合完咗都會玩小遊戲，呢個係大家儲 coins 嘅最佳辦法。玩晒咁多回合之後會隨機依據特定要求送兩粒星，例如：最多 coins 、行得最少、踩得最多負面格等等，最後攞得最多星嗰個就贏（星數相同就多 coins 嗰個贏）。
就咁睇好似無乜特別？但其實玩家踩到嘅每一格都有特別：
| 藍色 | 加 coins |
| 紅色 | 減 coins |
| 幸運格 | 隨機一個對自己有利嘅事件 |
| 蘑菇格 | 隨機獲得一款道具 |
| ！格 | 指定事件 |
| !? 格 | 隨機一個事件（主要為負面效果） |
| 同伴格 | 隨機加一個同伴 |
玩家仲有機會搵到隱藏磚磈，有機會攞到星星！經過道具商店可以買道具，有機會買到直接去星星前面一格嘅金水管！
每個角色除咗可以用普通骰之外都會有粒專屬骰，新手向揀返 Mario 就最啱。
有啲人可能會覺得呢個模式有啲悶，真心如果自己一個玩都真係幾悶，但如果同幾個熟嘅 friend 一齊喴嘩鬼叫，個人覺得玩得開心過 《 Overcooked 》！
除咗大富翁模式，仲有咩玩？
Mario Party 2 on 2
其實都係大富翁模式，不過轉成兩人一組嘅隊制賽，兩個隊員需要安排行咩路線可以最易 keep 住買到星，成件事更加鬥智鬥力！
▲ 2 on 2 有啲唔同，最主要係冇方向限制、踩對手會搶錢同買星星要踩正嗰一格。
河川生存戰
貌似普通划艇 game ，實際上同樣揉合小遊戲元素，途中撞到氣球就有得玩小遊戲，玩完會加秒數，最後一關會有個 boss 。
▲記得一定要撞氣球玩小遊戲，唔係嘅話一定唔夠時間！
成為節拍王
呢個就簡單易明，就係玩啲考節奏感嘅小遊戲。
小遊戲模式
顧名思義就係純粹玩小遊戲嘅模式，不過比較特別係有個「搶地盤大作戰」，玩小遊戲嘅同時有個類似黑白棋嘅遊戲，最終搶到最多格嘅就贏。
除咗小編上面介紹過嘅模式，仲有兩個隱藏模式交返俾大家發掘喇！如果你問我值唔值得買，我會問返你叫唔叫到朋友出嚟玩，因為就算上網同 friend 連機，都唔及成班人圍威喂咁有樂趣。如果真係叫到朋友一齊玩嘅，唔好諗，買啦！
