Nintendo 嘅 Mario 馬里奧角色深入民心，大人細路都鍾意，Mario 嘅遊戲亦多不勝數，各位玩家又知唔知 3 月 10 日係 Mario 嘅大日子呢，原來係 Mario Day 呀！或者可以寫成 Mar10 Day 都得，美國有一連串嘅慶祝活動，實行同 Mario 玩餐飽。
點解會有 Mar10 Day 呢？心水清嘅讀者見到將 Mario 最後兩個字母寫成數目字 10，加埋前面個 Mar，大槪都估到咩原因啦，無錯… 就係 Mar 10，即係 3 月 10 號囉。呢個 Mar10 Day 係由 2016 年開始，每年嘅 3.10 就成為 Mar10 Day 馬里奧日。
雖然 3.10 先係 Mar10 Day，但其實成個 3 月都可以話係屬於 Mario 嘅，事關美國 Nintendo 響紐約已開始咗一連串嘅慶祝活動，甚至搵埋著名童星 YouTuber Ryan Kaji 幫手，玩家可以同佢一齊打 Switch 遊戲，又響官方 YouTube 頻道釋出一段《Every Day Is a Mario Day on Nintendo Switch!》廣告短片，入面首歌係咁唱住「Make It A Mario Day」𠻹；唔止咁，美國 Nintendo 仲精選咗部分 Mario 嘅 Switch 遊戲提供折扣優惠，分兩個階段進行，總共有 9 款遊戲，可惜香港 Nintendo eShop 就無份。
《Every Day Is a Mario Day on Nintendo Switch!》廣告短片：
https://www.youtube.com/watch?v=rNCAjgJTA4I&t=73s
咁都有啲嘢關香港玩家事嘅，例如手遊《Mario Kart Tour》，由 3.07 開始嘅最新一輪巡迴賽就命名為「瑪利歐巡迴賽」，仲特別以 8-bit 造型嘅角色、車輛及滑翔傘為重點主題，見到都好吸引；另外《Mario Kart 8 Deluxe》嘅 Booster Course Pass DLC pack Wave 4 嘅 DLC 亦有得下載，有新賽道、新角色，玩家們記得留意。
順帶一提，《The Super Mario Bros. Movie》電影嘅 final trailer 亦會響美國 Pacific 時間 3 月 9 日下午 2:00 發表，即香港時間 3 月 10 日早上 6:00，粉絲可以去 Nintendo Direct 網頁欣賞。
《The Super Mario Bros. Movie》final trailer：
https://www.nintendo.com/nintendo-direct/03-09-2023/