話咁快 2022 年又過咗 4 個月，嚟到 5 月，望吓《 PCM 》雜誌嘅期數，原來距離 Issue 1500 剩返 5 期，再睇吓個月曆，咁啱 Issue 1500 就係響 5 月最後一個禮拜出街，至於「 Best of I.T. Award 2021 」結果，暫定會響 Issue 1499 釋出，公眾投票已經響 4.22 截止， 評審嘅投票亦接近尾聲，好快就會進入點票階段，等多幾個禮拜就會知道結果喇！
上個禮拜科技界有唔少花生料，最轟動業界嘅一定係 Elon Musk 以 US$440 億買起 Twitter 呢單，隔離 Francis （ 1496 期方保僑專欄）都有講，我唔講太多喇！但有錢又唔係萬能嘅，就算講到明嚟緊 Twitter 言論會更自由，前美國總統 Trump 都表態話唔會重返 Twitter ，繼續響自己成立嘅 TRUTH Social 社交平台發聲。
仲記得當年 iPhone 4 未出先被曝光嘅事件嘛？就係有人唔小心將部原型機留低響酒吧而出事，今次就輪到 Google 嘅第一隻親生仔智能手錶 Pixel Watch 喇！原本預計響嚟緊嘅 5.11-12 舉行嘅 Google I/O 先正式曝光，但就有人響 Android Central 放出咗疑似 Pixel Watch 嘅實物照，其中一張估計係開機時見到 Google 個「 G 」 字嘅畫面，今次唔知邊個咁唔小心呢？而呢隻錶又係咪真係傳聞中嘅 Pixel Watch 呢？響過多兩個禮拜舉行嘅 Google I/O 就知喇。
仲有一單未係咁關香港事嘅，就係 Apple 搞咗個自助維修計劃，比你自己 iPhone 自己整，呢個計劃響舊年 11 月公布，到上個禮拜正式響美國推出，當地用戶可以買到 iPhone 13 、 iPhone 12 系列、第 3 代 iPhone SE 嘅零件如屏幕、電池、鏡頭等返去，有需要 嘅話仲可以買埋維修工具，跟住維修手冊去整，唔想買維修工具又可以 US$49 租一個星期作單次維修，維修後將換咗出嚟嘅零件退返比 Apple ，仲會有返啲回贈比你，不過如無維修複雜電子裝置經驗嘅話，都係唔好亂嚟，否則分分鐘整唔到仲要買過部新嘅就得不償失呀！官方話呢個計劃今年稍後時間會推展至歐洲，唔知香港又幾時會有呢個服務呢？
