限聚令放寬，食肆、娛樂場所響有限制情況下回復營業，大家都等咗好耐，終於可以夜晚出街食飯、可以入戲院睇戲、可以有返啲人生樂趣，唔使淨係留響屋企好似困獸鬥咁，疫情期間不禁令人覺得，原來呢啲咁簡單嘅嘢，竟然響呢個世代會變得咁唔容易。
雖然戲迷們可以開開心心咁入返場睇戲，但好可惜亦有戲院因為敵不過疫情而要離場，講緊嘅就係伴隨香港人成長嘅 UA 院線，響上個禮拜一即係 3.08 ，響網上同埋旗下院線貼出公告宣佈全線結業……其實響結業前一日，已經有人響社交平台話打唔通 UA 嘅熱線引起懷疑，隨即亦有傳媒跟進，令到結業傳聞成為熱話，估唔到第二日官方就正式證實咗結業嘅事實，當日響 UA 院線門口貼出通告，話因「疫情及長期的經營壓力」而導致全線結業，而且仲話「這絕對是一個痛心及艱難的決定」，並感謝顧客及同事嘅鼓勵、支持，最後更表明已啟動清盤程序。
UA 正式結束 36 年嘅戲院業務，以後只能成為香港人嘅回憶。的而且確，響疫情期間有好多行業都唔易捱，特別係佔地多嘅行業，戲院、酒樓、健身中心等等，零收入又未必有資助，白交咁貴嘅租金，當然係倒水咁倒，入不敷支啦，能夠捱到今時今日都算係咁喇。
＊ ＊ ＊
除咗 UA 戲院結業，早一日都有一間香港知名嘅影音器材店結業，就係華仁會喇，相信就算係唔係影音發燒友應該都會聽過呢個名，佢哋響社交平台嘅專頁公佈，因為「租約期滿結業清貨」，清貨活動會去到 4 月 15 號，仲話「期待與您們有機會再次見面！」好！一定會等你嘅！
影音發燒友去旺角掃場點都會去逛逛嘅。
編者覺得今日因為咁嘅時勢而結業都好無奈，不過我信有實力嘅話，他朝一定能夠東山再起！