尋日《PCM》就報道過，3 香港將會於下月初免費派 5GB 儲值卡，但只係畀你睇 TVB 新頻道「myTV SUPER」咁話。今日就輪到香港寬頻宣布同TVB簽訂合作備忘錄，將會合作推出全新服務組合，用高速光纖家居寬頻搭 TVB 嘅 myTV SUPER，遲下仲會畀客戶免費試睇，詳情 3 月初公布。大台好落本宣傳喎，要提升收視率呀？
香港寬頻宣布現正與 TVB「緊密合作」，將會以「優惠價格」，推出 myTV SUPER 服務組合，客戶額外加裝一個全新的機頂盒，或下載 myTV SUPER App，就可以利用香港寬頻光纖寬頻網絡，以 OTT 形式收睇 myTV SUPER，包括 TVB 過往 48 年來的經典劇集和綜藝節目，以及最新的自家製作娛樂節目及外購節目。至於有冇 4K 高清節目，有關方面則三緘其口。香港寬頻又表示，用戶將有機會免費試用 myTV SUPER，但名額多少、條款限制等詳情，則要留待三月初公布。