影音

試玩 INNOCUBE 掌心投影機

2015-08-24

家陣人人行街搭車都掛住望手機或平板電腦，上網睇片打機全部侷限在一個 5、6 吋屏幕，其實咁細個屏幕真係減低好多樂趣，不過為咗流動性方便唯有犧牲一啲，呢部流動投影機號稱全球最細，可以去到邊睇到邊，最重要係投射出大畫面可以同至愛親朋一齊睇。

呢部由韓國製造的迷你投影機名為 INNOCUBE，內置充電可以流動使用，最大的賣點是可以用 MHL 接線連接手機或平板即插即用，雖然解像度只有 640×360，但在戶外投射出廿多吋的畫面絕不失禮，加上有埋內置喇叭，睇戲煲劇都好方便。


INNOCUBE的外殼以鋁質材料製成，有助散熱。	採用DLP DMD顯示技術。

呢部 INNOCUBE 的外型相當扎實，初接觸時很難想像是一部投影機，不過打開電源後看到其畫面就有一定的驚喜，雖然亮度及不上傳統投影機的規格，但用來投射手機或平板電腦上的畫面就已經足夠，最重要是不需要使用任何手機程式，手機要支援最新版本的 MHL 輸出（試過 Note 4 或者 iPhone 接 HDMI 轉頭可以用到），投影機會直接投射手機或平板的畫面，只望著投射畫面已經可以暢順操作任何功能。


機身設有手動對焦及音量鍵。	以 microUSB 充電需要 4 小時。

至於畫質表現較好的投射尺寸是 25 至 30 吋左右，這個尺寸在清晰度上會比較理想，而機身的內置喇叭音量亦足夠，雖然小巧但保持了良好的平衡度。

我們用 Samsung Note 4 手機內的 MX Player 播放 MV 短片，INNOCUBE 的流暢度不錯，顏色、光暗的還原表現亦合格，不過由於硬件支援度受制於 MHL，因此目前並不是所有的手機都支援 INNOCUBE，Android 陣營已知的 Samsung 及 Sony 最新的旗艦型號均可兼容，但 LG 的 G3 及 G4 就不兼容，打算購買 INNOCUBE 的朋友最好先了解自己的手機及平板電腦是否支援才作決定。