新 RX 1R II 首設可調式低通濾光鏡

近日， Sony 頻頻為旗下相機推新一代，今次輪到 Cyber-shot RX 1R II。新機沿用上一代設計，保持旗艦級輕巧數碼相機地位。

新加 AF-C 追蹤對焦模式，可以做到追焦下每秒 5 張連拍。	新一代刪去閃光燈，加入彈出式 XGA OLED 觀景器。

外形方面，跟上兩代確實冇乜分別，但細心啲睇，多咗好多貼心嘅細節位。RX 1 同 RX 1R 沿用的機頂閃光燈刪減咗，加入彈出式 XGA OLED 觀景器，喺陽光充沛嘅場景大派用場。而機背嘅顯示屏亦改用可折疊式 3 吋 WhiteMagic 120 萬點 LCD 顯示屏，可分別調較向上 109 度及向下 41 度，方便用唔同角度取景。

至於規格方面，新機採用銅線傳輸技術，傳輸速度比舊機快 3.5 倍，令自動變焦速度提升 30％。同時加入眼球對焦功能，相機可以自動偵測眼球位置進行對焦。新機採用 A7R II 嘅全片幅 ExmoR CMOS，令成像可達 4,240 萬像素，結合 BIONZ X 影像處理引擎可以將 ISO 擴充至 50-102400，加上支援拍攝非壓縮或壓縮 14-bit RAW 影像。

RX 1R II 採用 4,240 萬像素背照式全片幅 Exmor R CMOS，影像可以更細緻。	結合 BIONZ X 影像處理引擎，可以直接儲存 14-bit RAW 影像。

但最特別的是 RX 1R II 配備光學可調式低通濾光鏡，亦是全球首部配此功能的相機。相機透過不同電容改變光線穿過嘅角度，做出可調式低通濾光鏡。用家可以自行調較開關，唔洗再糾結於選擇有或者冇低通濾光鏡嘅相機，一部 RX 1R II 可以做晒兩種功能 。

RX 1R II 接受網上訂購，12 月初正式發售，售價為 ＄26,490。

查詢：Sony（2345 2966）