TVB 嘅 myTV SUPER 4 月 18 日正式推出，明日開始試播；繼早前宣布同香港寬頻合作後，3家居寬頻亦宣布推出「全家 Super Fun」娛樂組合，100M 家居寬頻連家居電話服務、無限 Wi-Fi、解碼器，以及 myTV SUPER 30 條主題頻道同點播節目內容，月費 $138 起；1G 光纖寬頻組合就月費 $188 起。除咗月費平對家大嗱嗱十蚊雞，仲話簽 25 個月就第 1 個月免費咁話。
「myTV SUPER」組合月費比較：
| 3家居寬頻「全家 Super Fun」 | 香港寬頻「myTV SUPER」服務組合 | |
| 100M 寬頻 + 無限 Wi-Fi | $138 (myTV 30條頻道 + 點播；第2個月起加 Disney 點播 + App) | $148 (myTV 30條頻道 + 點播 + App) |
| 500M 寬頻 + 無限 Wi-Fi | N/A | $168 (myTV 30條頻道 + 點播 + App) |
| 1G 寬頻 + 無限 Wi-Fi | $188 (myTV 30條頻道 + 點播；第2個月起加 Disney 點播 + App) | $198 ( myTV 30條頻道 + 點播 + App) |
如果於 4 月 17 日或之前申請 3 家居寬頻 100M 或 1G 嘅「全家 Super Fun」娛樂組合，合約期簽足至少 25 個月，首月月費就可獲豁免。由第 2 個月起，仲可以睇埋 Disney 點播組合，同埋送「額外流動裝置服務」，可以用手機或平板喺戶外睇 myTV SUPER 咁話；換言之，第 1 個月只可以坐定定喺屋企睇。睇返對家香港寬頻，雖然 24 個月合約期包埋流動應用程式，但就冇小朋友至愛嘅 Disney 頻道，月費亦貴少少。唔……真係要問下各位 TVBuddies 點揀好？
3 家居寬頻都好有信心，話可以提供「myTV SUPER」嘅極緻表現，煲劇冇窒格，所以推出埋「myTV SUPER 服務體驗保證」，保證組合用戶用解碼器睇 myTV SUPER 時，1 小時內出現不多於 10 次的視像緩衝，而每次視像緩衝或暫緩不會持續 10 秒或以上，否則會補償受影響日數嘅兩倍服務費畀用戶。