呢個月最矚目的遊戲都應該係長青格鬥Game《街霸5》，事關《街霸》呢個名堂一出都總有不少捧場客，阿Ryu同阿Ken兩師兄弟話哂都陪大家打咗咁多年，最新一集又點可以錯過呢？雖然行貨Game要過多幾日先有，不過歐版已經搶先登錄，可以快人一步搶先玩。
今次《街霸5》只有PS4同PC版本，所以應該吸引到唔少人出機，原本行貨要到16/2星期二先派貨出街，不過尋日（周六）下晝旺角電氣良品已經返咗PS4的《街霸5》歐版軟件，仲要有齊日、英語字幕同配音，並設有普通版及鐵盒版，普通版賣$498，鐵盒版賣$598，鐵盒版貴多一舊水就唔單止多個金屬盒包裝，而係會多一張服飾DLC，等你啲角色多幾套衫換吓。要玩街霸玩得勁自然需要大手掣，電氣良品就醒多個優惠俾大家，今日（14/2）凡購買《街霸5》PS4遊戲軟件，再選購Hori旗下的大手掣即減$100（現金價），想快人一步操熟隻Game就嗱嗱聲入貨啦！
查詢：Perfect Denki
（2359 7998／旺角信和）
（2782 0978／旺角好景）