近期各大網絡商都都幾多動作，今日更有一個新網絡商宣布大展拳腳，名為「自由鳥 Mobile 」。呢個新牌頭大玩免合約同行政費，仲大搞全城免費試用，拎張 SIM 即有最多 10GB 本地數據，聽落係咪好荀？
自由鳥 Mobile，個名聽落有點熟喎。冇錯，他們上年就以「自由鳥．遨遊 SIM 」之名，大搞只需一張 SIM 即可在不同國家使用漫遊數據的服務。他們今日正式以「自由鳥 Mobile 」此名稱宣布進軍本地市場，更話自己服務大賣夠彈性同破格！原因自由鳥 Mobile 全 Online 平台運作，沒有實體門市，要到自由鳥 Mobile 網站或下載專用 App 申請，成功後 SIM 卡就會寄到用戶手上。自由鳥 Mobile 提供的數據服務，更係毋需簽約仲要免 $18 行政費。另外，自由鳥 Mobile 用戶允許用戶間互傳數據，就爆 data 時可以搵其他朋友射數據來救急，都幾方便咁喎。
聽來自由鳥 Mobile 的賣點好似唔錯，他們就由即日起大搞試用活動，只要在 2 月 24 日前到自由鳥 Mobile 網站或下載專用 App 即可登記免費試用並啟動 SIM 卡，直至 3 月 25 日的試用期每月可有 5GB 、 21Mbps 速度的本地 4G 數據（ 5GB 數數據用後仍可以不高於 128kbps 速度上網），亦包含 1,000 通話分鐘，當然可利用「數據 P2P 」功能與朋友互傳數據啦。申請後大家亦可當呢張卡為漫遊 SIM ，購買「自由鳥．遨遊 SIM」提供的漫遊數據日費計劃在外地使用。整個試用期有 10GB 數據比你用，雖然係限速 21Mbps ，但日常使用都夠，依家仲要免費比你用，唔係唔申請呀嘛！
要記住，每位持有有效香港身份證用戶只可登記免費試用一次，先到先得，送完即止。另一樣要注意的是此卡月費計劃收費詳細仍有待公布，真係有興趣的話，大可先試完，再確實收費後才考慮是否繼續使用了。
自由鳥 Mobile 官方網站：按此
自由鳥 Mobile 應用程式（ iOS ）：按此
自由鳥 Mobile 應用程式（ Android ）：按此
