今時今日大家好多時都係拎住部手機「篤篤吓」，玩得幾咁入神，Facebook、Instagram、Whatsapp 成為大家 Kill Time 良伴。不過上個世紀智能手機未流行，大家對住電腦，好多時都係用 Windows 內置小遊戲「接龍」消磨時間，這款遊戲不經不覺面世 25 周年，今次 Microsoft 更將舉辦賽事，等大家可以向 Microsoft 員工挑機。
如果大家有返咁上下「腦齡」，可能都會玩過 Windows 3.0 內的「接龍」，呢款遊戲經典在唔需要花巧，玩下玩下都可以响不知不覺間玩足一日，以前更有唔少人返工無嘢做，日日對住個接龍解悶。去到今時今日，都市人咁忙，可能 Microsoft 都知大家唔會再有時間玩「接龍」，所以去到Windows 8，就將成個遊樂場抽起，而變成要到 App Store 下載。
為了慶祝呢款經典遊戲 25 周年，Microsoft 將會搞兩個「接龍」比賽，一個專為微軟員工內部而設，另一個則是公開組比賽，將會於 6 月 5 日開始，等大家可以同微軟員工一齊挑機，作為「接龍」的 Fans，係時候去 Windows 8／8.1 的程式集中下載 Microsoft Solitaire Collection 重溫一下，話唔定你都可以同微軟嘅高手挑戰呀！