雖然一早劇透，不過今晚終於叫正式登場，冇錯，講緊嘅就係 Samsung 兩款新機：Galaxy Note 5 同 S6 Edge+。規格實機照甚至跑分都早在發布會前流出，正式發布會都係官方證實一次咁解。
一如所料，Note 5 及 S6 edge+ 配備 5.7 吋 QHD Super AMOLED 屏幕，解像度達 2,560 x 1,440；兩者唯一分別是 S6 edge+ 具備雙側屏幕設計。兩款新機均用上 64 bit 八核心 (4 x 2.1GHz + 4 x 1.5GHz) 處理器，搭載 4GB RAM，是Galaxy系列首次配備如此強勁效能。至於大家關心嘅問題：有冇得插卡？Sorry 係冇嘅，兩款新機都只有 32GB 或 64GB 選擇，A餐定B餐自己揀。
單看外觀，Note 5 其實同 Note 4 分別不大，不過新機S Pen改用彈出式設計，一按S Pen即會自動彈出並啟動筆記應用。兩款新機電池容量均為3,000mAh，但就支援無線快充技術，只需約120分鐘就可以完全充滿電，用線充電的話則只需90分鐘。相機則無大升級，後鏡頭同前鏡頭分別為16MP及5MP。新機亦設有指紋感應器。兩款新機今晚起在英國預訂，備有黑、白、綠、金四色，香港開售日期及售價待定。
發布會另一亮點是Samsung Pay正式登場，除了支援信用卡、轉賬卡等等，更支援店方定製的會員卡及禮劵。透過NFC或 barcode 閱讀器掃描後，就可以完成付款，並有指紋認證及其他電子保安程序，帶少幾張卡出街。Samsung Pay預計於8月20日率先在韓國推出，繼而於9月28日在美國登場，其後逐步推至中國大陸等其他國家。
