Dell 在 CES 上推出兩款無線顯示器，分別為 23 吋及 24 吋。就咁睇好似唔多覺有乜特別，咪又係顯示器，不過睇真啲，原來 23 吋無線顯示器係另有乾坤：唔止顯示器無線，仲有得幫手機無線充電。
話說呢款 Dell 23 Wireless Monitor 係全高清顯示器，支援 Miracast 及藍牙功能，將任何 Windows 或 Android 裝置嘅畫面投射到屏幕。最有心思嘅係顯示器底座設計成無線充電座，支援 Qi 及 PMA 無線充電，放部手機喺上面就可以充電，變相買一送一，一路睇住《PCM》一路幫手機充電冇難度，唔使額外插住條 USB 線長期差電，陣間出街可以再開手機睇吓女版主有冇 CES 新消息。
顯示器基本功能都齊全，具備 178 度可視角、兩個 3W 喇叭、HDMI 插口及 USB 2.0 插口等等。至於大少少嘅 24 吋型號底座就冇無線充電組，不過邊框就更窄，色彩亦更鮮艷明亮。兩款顯示器將於 3 月 31 日起發售，23 吋型號定價 429 美元起，24 吋則為 469 美元起。
來源：Engadget, The Verge