你可能一個星期睇一場戲，你可能落樓下商場已經有間戲院，你可能偶像係馬田史高西斯，追求每一拳、每一下閃燈嘅聲都唔一樣；但數到香港地嘅電影院之最，你又知幾多呢？一齊溫故知新啦喂！
1：全港最大：The Grand Cinema
位於九龍站嘅 The Grand Cinema 有成 12 間院，總共有 1,600 個座位，仲有 Standard Chartered Starsuite VIP 包廂，雖之得 23 個位，但就張張都有獨立充電座，可以充手機同平板電腦。
2：全港最細：UA 太古城 Directors’ Club
有最大梗係有最細，位於太古城嘅 UA Directors’ Club ，雖然隔離都有太古城 UA 戲院，不過 Directors’ Club 包裝得似獨立運作，只有 3A 及 3B 影院，每個影院各自有 16 個座位，加埋先得 32 個位，包場專用呀。
 |
 |
3：全港最平：寶石戲院、豪華戲院
位於紅磡寶其利街嘅寶石戲院 1970 年開幕，只得一間院房，其 Facebook 專頁上聲稱 2D 票價 $45、3D 票價 $50，可能係全港最平。不過如果用《蝙蝠俠對超人：正義曙光》2D 版本做比較，當寶石戲院要 $55，點知喺旺角道嘅豪華戲院只需要 $50（講緊正場價喎）。你問邊間舊啲？寶石戲院曾經翻新，於 2012 年 10 月重新開張；豪華戲院就1991 年開張，外牆褪色的字體見證住歷史，計古早味似乎豪華小勝一仗。
4：全港最貴：The Grand Cinema – Standard Chartered Starsuite
The Grand Cinema旗下嘅VIP包廂Standard Chartered Starsuite，2D票價要$240，睇《蝙蝠俠對超人：正義曙光》3D版本就已經要$275，包埋爆谷、小食（薯片或雪糕）同飲品，飲品除咗汽水仲有咖啡同熱茶揀，認真富貴。
部分舊式戲票
5：開埠第一間戲院：同慶戲園
香港開埠以來第一間戲院名為「同慶戲園」（我冇打錯你冇睇錯，真係叫「戲園」），位於上環現時普慶坊與普仁街之間，1867 年開業，其後改名為「重慶園」或「重慶戲院」，初期演粵劇，後期亦有放映電影，至 1910 年結業。
6：第一間電腦售票戲院：京都戲院
已結業的灣仔京都戲院，於1989年開始使用電腦售票系統，不過當時只係雛型，其後為 UA、百老匯及嘉禾等相繼效法。
7：第一間電話及網上購票戲院：UA
UA 院線在 1993 年開創先河提供「電話購票通」，其後於 1997年亦係全港首間提供網上購票嘅院線。
8：第一間採用數碼播映戲院：新京都戲院
相比傳統菲林式播映，數碼播映系統現時已經相當普遍；而第一間採用數碼播映系統嘅戲院係位於灣仔嘅新京都戲院，該院於 1997 年 7 月 1 日放映第一部數碼電影－《第 100 日》，戲院現時已經結業。
來源：hktaorg.com, Wikipedia, 網絡圖片
延伸閱讀：
【區區有戲睇】地區戲院回歸做街坊生意！
