《全力扣殺》入面,林敏聰講咗個「太空喼」gag 笑破肚皮,乜嘢係太空喼?以前 70 年代初人類登陸月球屬於太空時代,任何高科技產品都要加「太空」兩隻字,咁就會好好賣!最近 Kickstarter 有件好嘢:來自美國三藩市品牌 Barracuda 公開集資,將生產一款非常適合現代都市人嘅高科技旅行喼,已經籌得超過 80 萬美元,集收納、擴充儲物、USB 充電、隨身工作檯同追蹤功能於一身,名乎其實攞你命 3000 版「太空喼」!
Barracuda 上 Kickstarter集資嘅 Project,真正照顧一般需要經常公幹嘅朋友需要,例如拖喼時嘅舒適順暢、等上機時停低處理公事、搵位充電甚至返屋企收埋行李箱嘅問題,佢都有細心諗過度過。
Barracuda原本都係以 2 萬美元作為開發成本,而家已經籌到超過 80 萬美元,超額 40 倍都仲未完成!整個計畫仲有大約 9 日就截止,想快人一步做呢個太空喼股東就去 Kickstarter 做善長喇!