比卡超熱一浪接一浪，唔止潮牌 Beams 會搵佢 Crossover（仲要啲 Product 成日一出就搶購一空），今次輪到 Casio 搵埋比卡超搞搞新意思。話說比卡超官方產品專賣店 Pokemon Centre 將會喺廣島開分店，為慶祝新店開張誌慶，當然會推出一系列限定商品，今次以鯉魚龍做主角，仲搵埋 Casio 合作，推出 Pokemon Centre X Casio EXILIM 特別版相機。
特別版機仔全金色機身，機面印有比卡超。最特別係內置 30 款特別貼紙，影完相後可以加上比卡超同其他小精靈，幾時都可以同比卡超親密合照！規格方面同一般 EX-ZS190 型號一樣，有效像素 1,610 萬像素，最高 ISO 1,600，配備 24mm 廣角鏡頭，支援 12 倍光學變焦，亦具備 720p 高清影片拍攝及美顏模式等基本功能。特別版相機將於 6 月 26 日廣島 Pokemon Centre 開幕同日推出，定價 23,000 日元（未連稅，折合約港幣 $1,440）。各位比卡超迷，很想要吧？
再提提大家，舊年係橫濱舉行過嘅 1,000 隻比卡超大集合嘉年華，今年會再度 Encore ，8月 8 日至 16 日，同樣係橫濱市再出巡！想睇比卡超跳舞就請定假啦～